TALIB ALI TALIB: "WANAOHOJI LOWASSA KUTENGENEZEWA FULANA ZENYE PICHA YAKE NA UJUMBE WA ‘FRIENDS OF LOWASSA’ (MARAFIKI WA LOWASSA) NI WASHAMBA"

MJUMBE wa Halmashauri Kuu ya Chama Cha Mapinduzi (NEC), Talib Ali Talib, amesema wanachama na viongozi wanaohoji Waziri Mkuu mstaafu Edward Lowassa kutengenezewa fulana zenye picha yake na ujumbe wa ‘Friends of Lowassa’ (Marafiki wa Lowassa) ni washamba.

 Akizungumza na Tanzania Daima jana, mjumbe huyo alisema haikuwa sahihi kwa Waziri Mkuu mstaafu John Samuel Malecela kushangaa fulana za kuunga mkono juhudi zinazofanywa na Lowassa za kuwaletea maendeleo wananchi kupitia makundi ya jamii.

 

Alisema mtu anayefanya jambo zuri, anastahili kuungwa mkono na kukumbukwa kwa njia mbalimbali zinazokubalika kama kuchapisha fulana na kuweka picha yake au kufanyiwa sherehe kama inavyotokea kwa viongozi wengine ndani na nje ya nchi.

 

“Watu wanaohoji fulana za Lowassa ni washamba, mbona hawahoji fulana za Bob Marley, Mandela, Mwalimu Nyerere?” alisema Talib, mjumbe wa NEC kupitia Wilaya ya Mjini, Zanzibar.

 

Kauli hiyo imekuja baada ya Malecela kudai haikuwa sahihi kwa Lowassa kuanza kampeni za urais kabla ya wakati kwa kuchapisha fulana zenye picha na ujumbe wa ‘Friends of Lowassa’.

 

Hata hivyo, Talib alisema imefika wakati viongozi wa CCM kujadili mambo yenye maendeleo badala ya mambo ya mitaani ambayo hayasaidii kujenga umoja na mshikamano katika kuelekea uchaguzi mkuu mwaka 2015.

 

Kuhusu kauli ya Katibu Uhamasishaji Chipukizi wa UVCCM, Paul Makonda, kwamba Lowassa hatoshi kuwa Rais wa Jamhuri ya Muungano wala Amiri Jeshi Mkuu kutokana na kutokuwa muadilifu, alisema kijana huyo amemvunjia heshima Lowassa na anapaswa kujadiliwa na kuchukuliwa hatua za kinidhamu.

 

Alisema UVCCM hakuna kikao kilichowahi kukaa kiwe cha sekreterieti au Baraza Kuu kujadili watu wanaotajwa kuwa na nia ya kugombea urais na kushangazwa na kauli ya Makonda kuchukuwa uamuzi wake binafsi na kuugeuza kuwa msimamo wa jumuiya hiyo.

 

Alisema kwamba madhumuni ya kuanzishwa UVCCM ni kuwatayarisha vijana kuwa viongozi wa baadaye, na kushangaa kitendo cha Makonda kumshambulia Lowassa hadharani bila ya kuzingatia tofauti yake ya umri.

>>Tanzania daima

TOA MAONI YAKO HAPA CHINI